وصلت رسالة الى دولة الرئيس نبيه بري وجاء فيها:
رح اكتب باللهجة اللي بتحبا، واللي حببتنا فيها، اللهجة الجنوبية
انا وكل المغتربين سمعنا صوتك، وحسّينا بخوفك وحرصك علينا، ولاني تعلمت منك التضحية كرمال اهلي وبلدي، أنا ما بدي كون أنانية وانزل على لبنان بهيدي الظروف، لان بحس بهيدا الموضوع في أولويات..
ما بدي كون عبء عليكن.
الأولوية للطلاب، للعائلات، للناس الموجودة ببلاد موبوؤة، او ببلاد امكانياتها محدودة..
أنا مش نازلي، كرمالكم، كرمال اعطي مجال لغيري..
أنا عايشة بفرنسا، موظفة وماشي حالي، والوضع هون بعده تحت السيطرة، وانشالله بضل هيك..
خلصت جامعتي بلبنان، وجيت لهون بمنحة تفوّق، خلصت الدكتوراه بتفوقّ، ولقيت شغل بمختبر مهم، وبعمري ما طلبت شي من السياسيين، ولا من الاحزاب ولا من حدا..
بس اليوم بظل كورونا الوضع اختلف وصارت طلباتنا غير.. بدّي منكم طلب واحد، بحال تأزمت الأوضاع بفرنسا، وصار عليي شي، بدي ارجع بالتّابوت، واندفن بلبنان، ما بدي انحرق أو انكب بشي مطمر وما حدا يعرف فيي..
هذا الطّلب بدي ياه منك يا بيي، والله يطول عمرك، وتضلك سند النا ولكل اللبنانيين، مقيمين ومغتربين، ويحمي لبنان وفرنسا وكل العالم.
هذه الرسالة وصلت من بعد ظهر اليوم الى الرئيس نبيه بري من ابنة بلدة طيردبا الجنوبية د. رنا عمر المغتربة في فرنسا، وقد جاءها الرد كالتالي: “انشالله ما تجي علبنان الا بصحة وسلامة وتفوق علمي ورأس مرفوع ووقتها بنستقبلك وبنرفع راسنا فيكي وبكل اللبنانيين المقيمين والمغتربين”.
